حسن پاکزادیان : ایرؤنی مَ

جؤن ؤ تَن ؤ مَ چَشی سؤ، تَ خاک و خُلَر مؤن

مَ وات ؤ نئوات، گُل گُله تَ، هؤر ؤ هؤنَر مؤن

تَ دَشت ؤ تَ صحرایی دامؤن سُوز ؤ سئبَلگَ

هُوچو نَبئنده سَرخُشید هَم کؤه ؤ کَمَر مؤن

صِی وئسّه ؤ فیروزه، نَ چؤند لاله( لَعلَ ) تَ دامؤن

بئگِرتَ جئگا هَم دِیی تَ سینِیی سَر مؤن

تَ ریگ ؤ شئن ؤ سنگ ؤ سئرا دُرّ ؤ عقیقَ

سور وئسّه واکئندی إنؤن ده خونی جئغَر مؤن

مهری تَ مَ دَل نِست ؤ خئداوئندی اَلُو کَ

خَل بَلّ ؤ بَل آتش ده مَ سَر رِه ؤ گؤذَر مؤن

رؤژی اَگَ هَم جؤن سَره جاجَسته اَبالیش

یک سَر گؤذرئندی تَرِ إشتؤن تَن ؤ سَر مؤن

دور از تَ مَ رِ رؤژی رئشؤن بؤنده شُوی تار

کِی دانده نئمود مؤنگ ؤ مُ، مَ شؤم ؤ سَحر مؤن

اَرمؤنی همیشه تَرِ آبادی بئوینئن

هَم پیر ؤ پئشِ، پور ؤ نئتاجه چَش ؤ سَر مؤن

ایرونی مَ، ویرؤنه نئوینی تَ ده (دئک کُل) (اَسلا)

سَرساته بئوینی تَ ده هَر گاه ؤ گؤدَر مؤن

حسن پاکزادیان

منبع:http://www.sangesarnews.com/?p=5879